ថ្នាំញៀនយ៉ាម៉ា ចំនួន២០០គ្រាប់ និងម្ចាស់ត្រូវនគរបាលស្រុកភ្នំព្រឹកឃាត់ខ្លួន
ខេត្ដបាត់ដំបង ៖ ជនសង្ស័យឈ្មោះ ឈុន ទ្រី ភេទប្រុស អាយុ ២៦ឆ្នាំ រស់នៅភូមិអូរ ឃុំពេជ្រចិន្តា ស្រុកភ្នំព្រឹក ខេត្តបាត់ដំបង ត្រូវបានកម្លាំងអធិការដ្ឋាននគរបាលស្រុកភ្នំព្រឹក ឃាត់ខ្លួនពីបទលក់ចែកចាយគ្រឿងញៀន ។
លោកវរសេនីយ៍ត្រី សុង សុភ័ក្រ្ត អធិការ នៃអធិការដ្ឋាននគរបាលស្រុកភ្នំព្រឹកបានឲ្យដឹងថា ដោយមានការណែនាំជារឿយៗ ពីលោកឧត្តមសេនីយ៍ត្រី ស ថេត ស្នងការនគរបាលខេត្ត ឲ្យខិតខំបង្ការ និងបង្រ្កាបបទល្មើសដែលកើតមានឡើង ដើម្បីអនុវត្តគោលនយោបាយភូមិ-ឃុំមានសុវត្ថិភាព ក្នុងនោះមានបទល្មើសគ្រឿងញៀនផងដែរ ។ នៅថ្ងៃទី៣០ ខែមីនា ឆ្នាំ២០១៣ វេលាម៉ោង១៧គត់ នៅចំណុចចំការស្វាយ ភូមិកណ្តាល ឃុំអូររំដួល ស្រុកភ្នំព្រឹក ខេត្តបាត់ដំបង កម្លាំងអធិការដ្ឋាននគរបាលស្រុក បានធ្វើការបង្រ្កាបឃាត់ខ្លួនជនសង្ស័យម្នាក់ខាងលើ និងដកហូតបានថ្នាំញៀនយ៉ាម៉ាបានចំនួន២០០គ្រាប់ បញ្ជូនទៅស្នងការដ្ឋាននគរបាលខេត្តដើម្បីរៀបចំសំណុំរឿងបញ្ជូនទៅសាលាដំបូងខេត្ត។
តាមចម្លើយសារភាពរបស់ជនសង្ស័យបានឲ្យដឹងថា ខ្លួនធ្លាប់លក់-ទិញថ្នាំញៀនយ៉ាម៉ាចំនួន ៥ដងរួចមកហើយ ខ្លួនបានទិញថ្នាំញៀនពីមនុស្សម្នាក់ដែលតែងតែណាត់ជួបគ្នានៅភូមិភ្នំតូច ឃុំពេជ្រចិន្តា ស្រុកភ្នំព្រឹក ។ ការទិញ-លក់ជាបន្តបន្ទាប់ រហូតដល់ល្ងាចថ្ងៃទី៣០ ខែមីនា ឆ្នាំ២០១៣ ខ្លួនបានលក់ថ្នាំញៀននេះឲ្យមនុស្សមិនស្គាល់ម្នាក់ នៅពេលខ្លួនកំពុងតែលក់ស្រាប់តែសមត្ថកិច្ចនគរបាលមកដល់ឃាត់ខ្លួន ហើយធ្វើការឆែកឆេរ និងដកហូតយកថ្នាំញៀនយ៉ាម៉ារបស់ខ្លួនចំនួន២កូនថង់ ស្មើនឹង២០០គ្រាប់ ព្រមទាំងនាំខ្លួនមកអធិការដ្ឋាននគរបាលស្រុក រួចបញ្ជូនមកកាន់ស្នងការដ្ឋាននគរបាលខេត្តតែម្តង ។
ករណីខាងលើនេះ ជនជាប់សង្ស័យ និងវត្ថុតាងថ្នាំយ៉ាម៉ាចំនួន ២០០គ្រាប់ សមត្ថកិច្ចយើងបានរៀបចំសំណុំរឿងតាមនីតិវិធីបញ្ជូនទៅកាន់តុលាការខេត្តហើយ ៕
BY: GCNP
No comments:
Post a Comment