គ្រោះថ្នាក់ចរាចរណ៍ បន្តយាយីក្នុងខេត្តតាកែវ រយៈពេល ៣ខែដំបូងនៃឆ្នាំនេះ
តាកែវ៖ មន្រ្តីនគរបាលជំនាញក្នុងខេត្តតាកែវ បានបង្ហាញអំពីកំណើនកើនឡើងនៃជនរងគ្រោះ ដោយសារគ្រោះថ្នាក់ចរាចរណ៍ក្នុងត្រីមាសទី ១ នៃឆ្នាំ២០១៣ នេះ ដោយព្រមានថា គ្រោះថ្នាក់ចរាចរណ៍នៅតែជាបញ្ហាប្រឈមនៅឡើយ ។
លោកវរសេនីយ៍ទោ ប៉ុក ពលរិទ្ធ នាយការិយាល័យនគរបាលចរាចរណ៍ជើងគោកនៃស្នងការដ្ឋាននគរបាលខេត្តតាកែវ បានមានប្រសាសន៍កាលពីថ្ងៃអង្គារទី ២ ខែមេសាម្សិលម៉ិញថា ក្នុងរយៈពេល ៣ ខែដំបូងនៃឆ្នាំ២០១៣ នេះគ្រោះថ្នាក់ចរាចរណ៍ក្នុងខេត្តតាកែវបានកើតឡើង ចំនួន ៧៦ លើក គឺកើន ១០ លើក បណ្តាលឲ្យស្លាប់មនុស្សចំនួន ៣៥ នាក់ គឺកើនចំនួន ៤ នាក់ និងធ្វើឲ្យរងរបួសចំនួន ៧៣ នាក់ គឺកើនចំនួន ២៩នាក់ ។
លោកមានប្រសាសន៍ថា ស្រុកក្នុងខេត្តតាកែវដែលរងគ្រោះខ្លាំងជាងគេ មានស្រុកត្រាំកក់ និង ស្រុកបាទី ហើយភាគច្រើននៃករណីគ្រោះថ្នាក់ចរាចរណ៍ គឺបណ្តាលមកពីការប៉ះទង្គិចគ្នារវាង ម៉ូតូ និង ម៉ូតូ ។ លោកក៏បានបង្ហាញថា កត្តាមនុស្ស គឺជាកត្តាចម្បងបំផុតដែលបណ្តាលឲ្យមានគ្រោះថ្នាក់ចរាចរណ៍កើតឡើង ដោយសារតែអ្នកបើកបរជាច្រើន មិនគោរពនូវច្បាប់ចរាចរណ៍ ។
សូមបញ្ជាក់ថា កាលពីឆ្នាំ២០១២ កន្លងទៅ គ្រោះថ្នាក់ចរាចរណ៍ នៅក្នុងខេត្តតាកែវ មានចំនួន ១៥១ លើក គឺច្រើនជាងឆ្នាំ ២០១១ ដែលមានត្រឹមតែចំនួន ១៤១ លើក ដោយឡែកចំពោះជនរងគ្រោះស្លាប់បាត់បង់ជីវិតវិញ មានចំនួន ៩២នាក់ គឺច្រើនជាងឆ្នាំ ២០១១ ដែលមានចំនួនត្រឹមតែ ៧៨នាក់ រីឯអ្នករបួសធ្ងន់ មានចំនួន ២០៧ នាក់ ច្រើនជាងឆ្នាំ ២០១១ ដែលមានចំនួន ២០១នាក់ ។
គ្រោះថ្នាក់ចរាចរណ៍ផ្លូវគោកនៅក្នុងប្រទេសកម្ពុជា ត្រូវគេចាត់ទុកថា ជាឃាតករដ៏កាចសាហាវ ជាក់ស្តែង វាបានឆក់យកអាយុជីវិតមនុស្សអស់ចំនួន ១.៨៩៤ នាក់ កាលពីឆ្នាំ២០១២ កន្លងទៅ ។
មន្រ្តីក្រសួងសាធារណការ និងដឹកជញ្ជូន បានប្រកាសថា គ្រោះថ្នាក់ចរាចរណ៍ផ្លូវគោកធ្វើឲ្យកម្ពុជាខាតបង់ប្រហែលជា ៣០០ លានដុល្លារអាមេរិក ក្នុង ១ឆ្នាំ ៕
By: Bayon
No comments:
Post a Comment