ប្រភព៖ CEN
ព្រះសីហនុ: បន្ទាប់ពីធ្វើស្រាវជ្រាវយ៉ាងល្អិតល្អន់ អស់រយៈពេលជិត២០ថ្ងៃមក នគរបាលខេត្តព្រះសីហនុ បានបញ្ចេញកំណត់ហេតុចុងក្រោយ ដោយបានអះអាងថា ករណីគ្រោះថ្នាក់ចរាចរណ៍រវាងរថយន្តកុងតឺន័រ ជាមួយរថយន្តតារាចម្រៀងខេមរៈសេរីមន្ត គឺជាកំហុសអ្នកបើកបររថយន្តកុងតឺន័រ។
នៅក្នុងកំណត់ហេតុដែលគេហទំព័រ CEN ទទួលបាននៅថ្ងៃទី២៦ខែមីនាឆ្នាំ២០១៣ បានបង្ហាញថា កំណត់ហេតុដែលចុះហត្ថលេខារបស់មន្ត្រីនគរបាលជំនាញយ៉ាងតិចចំនួន៦រូប បានពណ៌នាថា ករណីទី១ លក្ខណៈបច្ចេកទេសរថយន្ត មានប្រព័ន្ធហ្វ្រាំងល្អ កង់ឡានល្អ ចង្កូតដំណើរការល្អ ប៉ុន្តែអ្នកបើកបររថយន្តកុងតឺន័រ ឈ្មោះបាក់ រៀន ភេទប្រុស អាយុ៣០ឆ្នាំ បើកបរលឿនក្នុងស្ថានភាពផ្លូវចុះចំណោទ ផ្លូវកោង លើផ្លូវសើមដោយទឹកភ្លៀង ខ្វះការប្រុងប្រយ័ត្ន រួចរេចង្កូតមកខាងឆ្វេងបុកដើមអាកាស្យា រួចជ្រុលទៅបុករថយន្តតារាចម្រៀងខេមរៈសេរីមន្ត បង្កគ្រោះថ្នាក់តែម្តង។
ករណីទី២ អ្នកបើកបររថយន្តដឹកស្រាបៀរឈ្មោះម៉ន មុត ភេទប្រុស អាយុ៣៣ឆ្នាំ បើកបរលើផ្លូវសើមចុះចំណោទប្រើល្បឿនលឿន មិនស្តាប់បញ្ជារបស់ប៉ូលិសចរាចរណ៍ ដែលត្រួតពិនិត្យកន្លែងកើតហេតុ នៅដើមទី រួចរថយន្តដឹកស្រាបៀនេះ ក៏បានបុកទៅលើរថយន្តស្ទួច កំពុងធ្វើការងារសម្រួលចរាចរណ៍ ហើយផ្លាតទៅបុកជាមួយរថយន្តឈប់ស្ងៀមលើចិញ្ចើមផ្លូវចំនួន ៣គ្រឿងទៀត ទើបឡាននេះ ធ្លាក់ចូលទៅក្នុងប្រឡាយទឹកខាងស្តាំរបស់ខ្លួន។
កំណត់ហេតុនេះ បានបង្ហាញទៀតថា បច្ចុប្បន្ន នគរបាលចរាចរណ៍ និងសមត្ថកិច្ចពាក់ព័ន្ធ កំពុងប្រតិបត្តិការរឹតបន្តឹងត្រួតពិនិត្យទៅលើសភាពអ្នកបើកបររថយន្តដឹកទំនិញធំៗ ដើម្បីពង្រឹងការអនុវត្តច្បាប់ចរាចរណ៍ និងកាត់បន្ថយគ្រោះថ្នាក់ចរាចរណ៍លើផ្លូវជាតិលេខ៤។
សូមរម្លឹកថា ក្នុងហេតុការណ៍គ្រោះថ្នាក់ចរាចរណ៍ដ៏រន្ធត់ កាលពីម៉ោងជាង ៩យប់ ថ្ងៃទី៧ ខែមីនា ឆ្នាំ២០១៣ បង្កឡើងដោយឡានកុងតឺន័រ របស់ក្រុមហ៊ុន SK បានបុកនឹងឡាន Tuntra របស់លោក ខេមរៈ សិរីមន្ត រួមទាំងក្រុមការងារដែលត្រូវទៅសម្តែង concert នៅកំពង់សោម នាថ្ងៃទី៨មីនា នៃទិវានារីអន្តរជាតិ។
ក្នុងហេតុការណ៍ គ្រោះថ្នាក់ចរាចរណ៍ លើកំណាត់ផ្លូវជាតិលេខ៤ ក្នុងភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ បានបណ្តាលឲ្យមនុស្ស ៤ នាក់ ស្លាប់ភ្លាមៗ និងរបួស ៣ នាក់ ដែលរួមទាំងលោក ខេមរៈ សិរីមន្ត ត្រូវបានគេអះអាងថា រងរបួសស្រាល។
ក្នុងចំណោមអ្នកស្លាប់ទាំង ៤ នាក់នោះ មានកូនប្រុសម្នាក់របស់អ្នកកំប្លែង នាយកុយ និងកូនប្រុសម្នាក់របស់អ្នកចម្រៀងអាយ៉ៃ លោកស្រី ណយ សំណាង។
ក៏ប៉ុន្តែចៃដន្យអាក្រក់ រហូតដល់ពាក់កណ្តាលយប់ ម៉ោងជាង ១ ឈានចូលថ្ងៃទី៨ ខែមីនា ឆ្នាំ២០១៣ ក៏មានឡានកុងតឺន័រ របស់ក្រុមហ៊ុនស្រាបៀរអង្គរ បានបើកបុកឡានស្ទូច ឡានពេទ្យ ឡានប៉ូលិស និងឡានរបស់ក្រុមហ៊ុនធានារ៉ាប់រង ដែលចតនៅកន្លែងកើតហេតុនោះ បណ្តាលឲ្យស្លាប់មនុស្ស ៣ នាក់ និងរបួស ៤ នាក់ថែមទៀត។
សរុបទៅ ក្នុងព្រឹត្តិការណ៍គ្រោះថ្នាក់ចរាចរណ៍ផ្ទួនគ្នានោះ បណ្តាលឲ្យស្លាប់ ៧ នាក់ និងរបួស ៧ នាក់។
នៅឯការិយាល័យប៉ូលិសចរាចរណ៍ខេត្តព្រះសីហនុ នាយកុយ និងយាយណាង និងក្រុមគ្រួសារជនរងគ្រោះ ដែលបានស្លាប់ជាមួយគ្នា ក្នុងឧបទ្ទវហេតុគ្រោះថ្នាក់ចរាចរណ៍ ដែលបង្កឡើងដោយរថយន្តកុងតឺន័ររបស់ក្រុមហ៊ុន SK បើកបុករថយន្តតារាចម្រៀង ខេមរៈ សិរីមន្ត បានអញ្ជើញចូលមកដាក់ពាក្យបណ្តឹងរួចរាល់ហើយ នៅរសៀលថ្ងៃទី១០ ខែមីនា ឆ្នាំ២០១៣៕
--------
មើលវីដេអូ តារាចម្រៀង ខេមរៈ សិរីមន្ត បកស្រាយអំពីគ្រោះថ្នាក់ចរាចរណ៍នេះ ៖
No comments:
Post a Comment