ប្រធានាធិបតីចិនផ្ដល់ប្រាក់ជំនួយជាកាដូដល់កម្ពុជា
ប្រធានាធិបតីចិន លោក ហ៊ូ ជិនតាវ (Hu Jintao) នៅថ្ងៃទី៣១ ខែមីនា ឆ្នាំ២០១២ បានឯកភាពផ្ដល់ជំនួយចំនួនរវាង ៣០០លានដុល្លារអាមេរិក ទៅ ៥០០លានដុល្លារអាមេរិកក្នុងមួយឆ្នាំៗ សំរាប់រយៈពេល ៥ឆ្នាំ តាមសំណើរបស់លោកនាយករដ្ឋមន្ត្រី ហ៊ុន សែន ដើម្បីយកមកចំណាយលើគំរោងសាងសង់ប្រព័ន្ធធារាសាស្ត្រ ផ្លូវថ្នល់ ស្ពាន និងវិស័យកសិកម្មជាដើម។
បន្ថែមលើនេះទៀត លោក ហ៊ូ ជិនតាវ បានសន្យាថា ប្រទេសចិន និងផ្តល់ជំនួយឥតសំណងចំនួន ២៥០លានយន់ ស្មើនឹងជាង ៣២លានដុល្លារអាមេរិក និងកម្ចីសម្បទានចំនួន ២០០លានយន់ទៀត ស្មើនឹងជាង ២៥លានដុល្លារអាមេរិក ជាអំណោយ ឬកាដូ ក្នុងពេលលោកមកទស្សនកិច្ចប្រទេសកម្ពុជា ពេលនេះ។
ក្រុមអ្នកតាមដានសភាពការណ៍នយោបាយអន្តរជាតិ បានកត់សំគាល់ថា កាដូនេះគឺនៅគ្រាដែលប្រទេសកម្ពុជា ជាប្រធានអាស៊ាន បានសន្យាថា នឹងមិនលើកយកបញ្ហាជំលោះនៅសមុទ្រចិនខាងត្បូង ឲ្យក្លាយជាបញ្ហាអន្តរជាតិទេ ដោយទុកបញ្ហានេះសំរាប់ការដោះស្រាយក្នុងក្របខ័ណ្ឌរវាងអាស៊ាន និងចិន។ មួយវិញទៀត លោក ហ៊ូ ជិនតាវ បានអរគុណលោក ហ៊ុន សែន ដែលរក្សាគោលនយោបាយចិនតែមួយ។
រដ្ឋមន្ត្រីអមប្រតិភូនាយករដ្ឋមន្ត្រី លោក ស្រ៊ី ថាមរុង្គ បានមានប្រសាសន៍ប្រាប់អ្នកកាសែតនៅឯវិមានសន្តិភាព នៅថ្ងៃទី៣១ ខែមីនា ឆ្នាំ២០១២ ក្រោយពីជំនួបរយៈពេលជាង ២ម៉ោង រវាងលោកនាយករដ្ឋមន្ត្រី ហ៊ុន សែន និងប្រធានាធិបតីចិន ហ៊ូ ជិនតាវ ថា ទស្សនកិច្ចនេះបានផ្ដល់លទ្ធផលល្អ និងភាពជោគជ័យ ដោយភាគីទាំងពីរ កម្ពុជា និងចិន បន្តបង្កើនកិច្ចសហប្រតិបត្តិការ និងការជឿទុកចិត្តគ្នាជាដៃគូយុទ្ធសាស្ត្រ៖ «យើងដឹងហើយថា ទំនាក់ទំនងរវាងកម្ពុជា និងចិន បានដើរដល់ជំហានមួយខ្ពស់ គឺថា ទំនាក់ទំនងជាយុទ្ធសាស្ត្រ ជាដៃគូយុទ្ធសាស្ត្រគ្រប់ជ្រុងជ្រោយ»។
ទាក់ទងនឹងជំនួយរបស់ប្រទេសចិននោះ តំណាងរាស្ត្រគណបក្ស សម រង្ស៊ី លោក សុន ឆ័យ បានមានប្រសាសន៍ថា កម្ពុជាកំពុងតែផុងជ្រៅក្នុងការខ្ចីបុលពីប្រទេសចិន ចំនួនរហូតជាង ៤ពាន់លានដុល្លារអាមេរិកមកដល់ពេលនេះ។
លោក សុន ឆ័យ បន្ថែមដូច្នេះ៖ «នាំឲ្យប្រទេសកម្ពុជា រងគ្រោះថ្នាក់ច្រើនយ៉ាង។ ការតម្រូវឲ្យសងប្រទេសចិន ក្នុងរយៈពេលខ្លី ដែលក្នុងនោះយើងមិនអាចមានលទ្ធភាពក្នុងការសងឲ្យទាន់ពេលវេលា ក្រៅតែពីផ្ដល់នូវធនធានរ៉ែផ្សេងៗ ដែលមាននៅក្នុងប្រទេសកម្ពុជាយើងជាសំណង...»។
ក្រៅពីនេះ លោកនាយករដ្ឋមន្ត្រី ហ៊ុន សែន និងប្រធានាធិបតីចិន លោក ហ៊ូ ជិនតាវ បានឯកភាពគ្នាថា នឹងបង្កើនការផ្លាស់ប្ដូរពាណិជ្ជកម្មចិន និងកម្ពុជា ឲ្យកើនដល់ចំនួន ២.៥០០លានដុល្លារអាមេរិកនៅឆ្នាំ២០១៥។
លោក ហ៊ុន សែន និងលោក ហ៊ូ ជិនតាវ បានចូលរួមក្នុងពិធីចុះហត្ថលេខាលើកិច្ចព្រមព្រៀងទ្វេភាគីចំនួន ១០ ផ្ដោតលើការអភិវឌ្ឍវិស័យកសិកម្ម ប្រព័ន្ធធារាសាស្ត្រ ផ្លូវថ្នល់ ស្ពាន និងវិស័យសំខាន់ៗមួយចំនួនទៀត។
នៅក្នុងជំនួបរវាងលោកនាយករដ្ឋមន្ត្រី ហ៊ុន សែន និងប្រធានាធិបតីចិន លោក ហ៊ូ ជិនតាវ នោះដែរ លោក ហ៊ុន សែន ក៏បានបញ្ជាក់ថា កម្ពុជាជាប្រធានអាស៊ាន គឺធ្វើយ៉ាងណាឲ្យបញ្ហាជំលោះនៅសមុទ្រចិនខាងត្បូងនោះ ស្ថិតនៅក្នុងការពិភាក្សារវាងចិន និងអាស៊ាន។ លោកមិនឲ្យបញ្ហានេះក្លាយជាបញ្ហាអន្តរជាតិទេ។
មួយវិញទៀត លោក ហ៊ូ ជិនតាវ បានបញ្ជាក់ដែរថា ប្រទេសចិន គាំទ្រប្រទេសកម្ពុជា ឲ្យក្លាយជាសមាជិកមិនអចិន្ត្រៃយ៍របស់ក្រុមប្រឹក្សាសន្តិសុខអង្គការ សហប្រជាជាតិសំរាប់អាណត្តិឆ្នាំ២០១៣ ដល់ឆ្នាំ២០១៤ ខាងមុខនេះ៕ដោយ៖ RFA
Subscribe to:
Post Comments (Atom)
No comments:
Post a Comment