នៅក្នុងឱកាសទិវានៃក្ដីស្រលាញ់ ដែលហៅជាភាសាអង់គ្លេសថា វ៉ាឡិនថាញ ដេយ (Valentine’s day) ក្រសួងស្ថាប័នអប់រំ និងអង្គការសង្គមស៊ីវិលដែលធ្វើពាក់ព័ន្ធបញ្ហាយុវជន បានធ្វើយុទ្ធនាការទប់ស្កាត់ការភ្លើតភ្លើនហួសហេតុរបស់យុវវ័យនៅ ក្នុងទិវានេះ។
កន្លងទៅមានការរិះគន់ដល់យុវវ័យថា បានយល់ច្រឡំចំពោះអត្ថន័យទិវាក្ដីស្រលាញ់ថ្ងៃទី១៤ កុម្ភៈ គឺជាថ្ងៃបុណ្យសង្សារ ដែលនាំឲ្យយុវវ័យមួយចំនួន បានបូជាខ្លួនប្រាណទៅឲ្យគូសង្សាររបស់ពួកគេ នៅក្នុងថ្ងៃនោះទៀតផង។
តើយុវវ័យមានការយល់ដឹង និងមានការផ្លាស់ប្ដូរឥរិយាបថយ៉ាងណាខ្លះចំពោះទិវានេះ?
ផ្កាកូឡាបត្រូវបានយុវវ័យភាគច្រើនចាត់ទុកថា ជានិម្មិតរូបសំខាន់ក្នុងដួងចិត្តរបស់ពួកគេ ដោយអ្នកខ្លះគេចាត់ទុកផ្កាកូឡាបជាតំណាងនៃក្ដីស្រលាញ់របស់គេទៅ លើនរណាម្នាក់។
ផ្កាកូឡាបចម្រុះពណ៌ត្រូវបានគេដាក់លក់ និងតាំងបង្ហាញ លាយឡំនឹងតុក្កតា វត្ថុផ្សេងៗធ្វើជារាងបេះដូង និងស្ករសូកូឡាយ៉ាងច្រើន នៅតាមស្តង់នាដងវិថីមួយចំនួនក្នុងទីក្រុងភ្នំពេញ ខុសពីថ្ងៃធម្មតា។ វត្ថុម្យ៉ាងដែលពិសេសជាងគេនាពេលនេះ គឺផ្កាកូឡាបដែលគេទិញជូនគ្នាសម្រាប់ជាតំណាងដោយសេចក្ដីស្រលាញ់ នៅក្នុងឱកាសទិវានៃក្ដីស្រលាញ់ ថ្ងៃទី១៤ កុម្ភៈ។
ក្នុងទឹកមុខញញឹមស្រស់បស់ យុវតីអាយុ ១៩ឆ្នាំ ឈ្មោះ ហេង នីសា បានរៀបរាប់ថា នៅក្នុងឱកាសនេះនាងយល់ថា អាចលក់ផ្កាបានចំណេញច្រើន។ មិនត្រឹមតែប៉ុណ្ណោះ នាងជាអ្នកលក់បានយល់ដឹងពីអត្ថន័យនៃទិវានេះយ៉ាងច្បាស់ដែរ។
យុវតី ហេង នីសា៖ «អ្នកខ្លះចង់ទិញជូនប៉ាម៉ាក់គេ ឬក៏បងប្រុសបងស្រី ឬប្អូនគេអ៊ីចឹង មានដូចជាតុក្កតា សូកូឡា ផ្កានិយាយទៅផ្កាគឺជាតំណាងនៃក្ដីស្រលាញ់ សូកូឡា អ៊ីចឹងនិយាយពីភាពផ្អែមល្ហែម គឺរបៀបថា សំដៅទៅការជិតស្និទ្ធ មិនមែនតែសំដៅតែគូរសង្សារទេ និយាយទៅដូចជាយើងស្រលាញ់ម៉ាក់ប៉ា មនុស្សជាទីស្រលាញ់របស់យើង បងប្អូនយើង ក្រុមគ្រួសារសាច់ញាតិរបស់យើង ឬក៏ជីដូនជីតាផ្សេងៗ»។
យុវតីអាយុ ១៧ឆ្នាំ ឈ្មោះ ហ្សូ ហេឡេន រៀននៅសាកលវិទ្យាល័យវ៉េនស្ទើ (Western) ដែលបានទិញផ្កាជូនឪពុកម្ដាយរបស់នាងនៅក្នុងទិវានៃក្ដីស្រលាញ់ បានអះអាងថា តាមរយៈការអប់រំនៅក្នុងសាលាកន្លងមក លោកគ្រូអ្នកគ្រូ និងសាស្ត្រាចារ្យក៏បានបញ្ជ្រាបពីអត្ថន័យនៃទិវានេះដែរ។
នាងបានដំអក់បន្តិចនៅពេលលឺសំណួរថា យុវវ័យមួយចំនួនបានយល់ច្រឡំ និងប្រព្រឹត្តមិនគប្បីនៅក្នុងឱកាសនេះ៖ «ឃើញ គេដាក់តាមទស្សនាវដ្ដីឃើញអី គេសរសេរថា ថ្ងៃហ្នឹងជាថ្ងៃទិវានៃក្ដីស្រលាញ់ មិនមែនទិវាឡើងផ្ទះសំណាក់ ឬក៏សណ្ឋាគារនោះទេ ខ្ញុំបានឃើញគ្របខាងលើ។ ថ្ងៃបុណ្យនៃក្ដីស្រលាញ់ គឺមិនមែនសម្រាប់តែសង្សារតែពីរនាក់ទេ អាចជូនទៅដល់បងប្អូនក៏ដូចជា ក្រុមគ្រួសាររបស់យើងអ្នកដែលយើងស្រលាញ់ទាំងអស់ មិនមែនចំពោះតែគូរសង្សារទេ»។
យុវជនឈ្មោះ អ៊ឹង សុខា អាយុ ២២ឆ្នាំ មានជំនឿថា យុវវ័យមានការយល់ដឹងច្រើនចំពោះអត្ថន័យនៃទិវាក្ដីស្រលាញ់ ដោយសារមានការអប់រំតាមរយៈប្រព័ន្ធផ្សព្វផ្សាយ និងតាមគ្រឹះស្ថានអប់រំជាដើម៖ «ពីមុនមកករណីហ្នឹងអាចកើតឡើង ច្រើនដែរ ពីព្រោះអីឃើញផ្សាយតាមកាសែតទូរទស្សន៍អីគេបាននិយាយច្រើនពីបញ្ហា ហ្នឹង។ ករណីថា ថ្ងៃបុណ្យសង្សារឡើងផ្ទះសំណាក់ ប្រគល់ខ្លួនប្រគល់អ៊ីចឹង។ ប៉ុន្តែខ្ញុំក៏អត់ដឹងច្បាស់ដែររឿងហ្នឹង តែសម្រាប់ពួកខ្ញុំអត់មានយល់អ៊ីចឹងទេ គិតថា ថ្ងៃហ្នឹងជាថ្ងៃបុណ្យនៃក្ដីស្រលាញ់មិនមែនជាថ្ងៃបុណ្យសង្សារ ប្រគល់ខ្លួនប្រគល់ប្រាណអីទេ»។
នៅក្នុងពិធីបើកការដ្ឋានសាងសង់ពង្រីកកំណាត់ផ្លូវជាតិលេខ៦ លោកនាយករដ្ឋមន្ត្រី ហ៊ុន សែន ក៏បានផ្ដាំផ្ញើឲ្យយុវវ័យមានការយល់ដឹងឲ្យច្បាស់ចំពោះអត្ថន័យ ពិធីបុណ្យនៃក្ដីស្រលាញ់នេះ រក្សាសេចក្ដីស្រលាញ់ឲ្យនៅគង់វង្សស្ថិតស្ថេរ គោរពប្រតិបត្តិដល់មាតាបិតា។
លោក ហ៊ុន សែន៖ «ឥឡូវយើងរាំងស្កាត់ចំពោះយុវជនក៏វាលំបាក ប៉ុន្តែសុំឲ្យយុវជនយុវនារីយល់ឃើញថា នេះមិនមែនជាវប្បធម៌របស់យើងទេ ប៉ុន្តែធ្វើម៉េចបើក្មួយៗ ឬក៏អ្នកដទៃ បានជាធ្វើបុណ្យនៃក្ដីស្រលាញ់ទៅហើយ។ ហើយក្ដីស្រលាញ់របស់យើងនេះ គឺមិនមែនសំដៅតែចំពោះប្រុសស្នេហ៍ ឬស្រីស្នេហ៍ទេ មិនមែនទេ ហើយកុំឲ្យស្រលាញ់តែមួយថ្ងៃ សុំឲ្យស្រលាញ់មួយជីវិត ស្រលាញ់ម្ភៃបួនម៉ោង ស្រលាញ់មួយអាទិត្យ ស្រលាញ់មួយខែ ស្រលាញ់ ៣៦៥ថ្ងៃក្នុងមួយឆ្នាំ ស្រលាញ់តរៀងរហូតទៅ កុំឲ្យស្រលាញ់តែមួយថ្ងៃហ្នឹងស្អែកបោះបង់ចោល»។
នៅក្នុងឱកាសនេះ គឺជាពេលវេលាមួយដែលអ្នកប្រកបអាជីវកម្មលក់ផ្កាទទួលបានផលចំណេញច្រើន។
បុគ្គលិកវេចខ្ចប់ផ្ការបស់ហាង ខ្មែរហាត (Khmer heart) នៅតាមវិថីប៉ាស្ទ័រ បានថ្លែងទាំងមមាញឹក ដោយដៃកំពុងវេចខ្ចប់ផ្កាជូនអតិថិជនថា គាត់លក់អស់រាល់ទិវានេះម្ដងៗមិនដែលសល់ទេ៖ «លក់អស់រាល់ឆ្នាំហ្មង។ នេះមួយបាច់នេះមួយរយទង ១៥០ដុល្លារទាំងខ្ចប់។ គេទិញជូនប៉ាម៉ាក់ ជូនភរិយាអ៊ីចឹងណា»។
យុវវ័យមួយក្រុមគេបានទាញយកផលប្រយោជន៍ពីការលក់ផ្កានៅក្នុង ទិវានៃក្ដីស្រលាញ់ ឬគេហៅថា ថ្ងៃបុណ្យសង្សារ ទី១៤ កុម្ភៈនេះ ដើម្បីជួយដល់កុមារក្នុងសហគមន៍ក្រីក្រ។
កញ្ញា គុយ កែវ មរកត អាយុ ២០ឆ្នាំ ជាសិស្សនៃសាកលវិទ្យាល័យបញ្ញាសាស្ត្របានរៀបរាប់ដូច្នេះ៖ «ពួក ខ្ញុំរៀនខាង Business (ពាណិជ្ជកម្ម) ដល់ពេលអ៊ីចឹង គ្រូគាត់ឲ្យខ្ញុំរកវិធីសាស្ត្រអីដើម្បីរកប្រាក់ចំណេញបាន ដើម្បីទៅជួយសហគមន៍ក្មេងកំព្រា ក្មេងក្រីក្រអ៊ីចឹងទៅ។ ពួកខ្ញុំដូចថា ត្រូវលក់នរណាដែលអាចបានចំណេញ និងលក់ស្រួល ហើយលក់នោះមិនមែនសំខាន់លើបុណ្យសង្សារអីទេ ដូចថា នរណាចង់ទិញជូនអ្នកជាទីស្រលាញ់ ទិញជូនមិត្តភក្តិបងប្អូន ម៉ាក់ប៉ា។ គោលការណ៍ពួកគាត់ត្រូវជួយក្មេង»។
ទិវានៃក្ដីស្រលាញ់មានដើមកំណើតមកពីលោក វ៉ាឡិនថាញ (Valentine) ជាជនជាតិរ៉ូមុំាងម្នាក់បានបាត់បង់ជីវិត ដោយសារការប្រឆាំងដាច់ខាតមិនលះបង់ជំនឿទៅលើព្រះយេស៊ូគ្រិស្ត។ ហើយបុរសនេះបានទទួលមរណភាពនៅថ្ងៃទី១៤ កុម្ភៈ ប៉ុន្តែឆ្នាំមានការសរសេរខុសៗ គ្នា។ ការកត់ត្រាខ្លះថា ឆ្នាំ២៩៦ ខ្លះថា ឆ្នាំ២៧០ និងខ្លះទៀតថា ឆ្នាំ២៧៣។ ថ្ងៃ១៤ កុម្ភៈ ត្រូវបានគេឧទ្ទិសបូជាសម្រាប់សេចក្ដីស្រលាញ់។ មិនយូរប៉ុន្មានថ្ងៃនោះត្រូវបានមនុស្សទូទៅនាំគ្នាផ្ញើសារនៃ សេចក្ដីស្រលាញ់ឲ្យគ្នាទៅវិញទៅមក ហើយលោក វ៉ាឡិនថាញ បានក្លាយជានិមិត្តរូបនៃសេចក្ដីស្រលាញ់សម្រាប់គូស្នេហ៍បង្ហាញ សេចក្ដីស្រលាញ់ទៅកាន់មិត្តភក្តិ និងអ្នកជាទីស្រលាញ់ដោយផ្ញើពាក្យកាព្យ និងកាដូ (វត្ថុអនុស្សាវរីយ៍) មានដូចជាផ្កាជាដើម៕ ដោយ៖ RFA
Subscribe to:
Post Comments (Atom)
No comments:
Post a Comment